كيف نتوب ..؟

نسأل الله أن يتوب علينا و على عصاة المسلمين ..
أولا لكي نتوب شروط التوبة محفوظة :
...
1_الإقلاع عن الذنب
2- الندم على ما فات
3- العزم على عدم العودة
4-رد المظالم

أول شرط من شروط التوبة :
الإقلاع عن الذنب
ـــــــــــــــــــــــــــــــــ
ياما ناس لما تقوله بطل سجاير يقول لك لما ربنا يتوب عليا ..!!
بطل و يبقى ربنا تاب عليك ..!!
صلي .. لما ربنا يهديني ..!!
صلي و يبقى ربنا هداك ..!!
إلبسي الحجاب .. : لما ربنا يأذن ..!!
إلبسي و يبقى ربنا أذن ..!!
هي دي القضية .. هي دي القضية إن الناس فاهمة غلط .. معنى إن ربنا يتوب عليه إنه يصبح كدة و يلاقي نفسه ما بيدخنش .. طب إزاي ..؟!
مش ربنا جعل لك إرادة ..؟! ... و ربنا جعل لك مشيئة ؟! ... و ربنا جعل لك رغبة ..؟!
و ربنا جعل لك حركة تقدر تعمل بيها ..؟!
الله عزيز .. لا يقبل إلا من يُقبِل عليه ..! .. إفهم دي .. لازم تقرب عشان يقرب لك .. عشان كدة إنت سمعت معايا قول الله عز و جل في الحديث القدسي : (( من تقرب إلي شبراً تقربت إليه ذراعاً و من أتاني يمشي أتيته هرولة )) ... لازم تيجي عشان يجيلك ... لازم تقرب له عشان يقرب لك ..
لازم تعمل له عشان يرضى عنك .. كما في الحديث .. حديث الثلاثة نفر في الصحيح عن أبي واقد الليثي قال : « إن رسول الله صلى الله عليه وسلم بينما هو جالس في المسجد والناس معه إذ أقبل ثلاثة نفر، فأقبل اثنان إلى رسول الله صلى الله عليه وسلم وذهب واحد، قال: فوقفا على رسول الله صلى الله عليه وسلم، فأما أحدهما فرأى فرجة في الحلقة فجلس فيها، وأما الآخر فجلس خلفهم، وأما الثالث فأدبر ذاهبا، فلما فرغ رسول الله صلى الله عليه وسلم قال: ألا أخبركم عن النفر الثلاثة ؟ أما أحدهم فآوى إلى الله فآواه الله، وأما الآخر فاستحيا فاستحيا الله منه، وأما الآخر فأعرض فأعرض الله عنه.

هي كدة ! .. بتتعامل مع رب عزيز .. قال الله (( نَسُوا اللَّهَ فَنَسِيَهُمْ)) ..
لازم كدة ..تأوي إلى الله لكي يؤويك .. و تقترب منه لكي يحميك .. و تستعين به لكي يعينك .. و تتودد إليه لكي يحبك .. لازم ..
يبقى الشرط الأول الإقلاع .. واخد بالك معايا من كلمة الإقلاع .. النهاردة بيقولوا على الطائرة لما تيجي تطير يقولوا عليها إيه " الإقلاع " .. أهو أن عايزك تقلع يعني تطير .. ترتفع عن السفاسف .. ترتفع عن الهموم .. ترتفع عن المعاصي ... ترتفع عن الذنوب .. ترتفع عن الشهوات .. تعلى شوية عن الأشياء التي تلصقك بالأرض ..!!
ترتفع لأن الله جل جلاله مستوٍ على عرشه فوق سماواته لذلك قال صلى الله عليه و آله و سلم "إنك ما سجدت لله سجدة إلا و رفعك بها درجة " .. "واسْجدْ واقْتربْ " .. نعم أول حاجة الإقلاع .

ثاني شرط من شروط التوبة
العزم على عدم العودة ..
ـــــــــــــــــــــــــــــــ
يبقى أول حاجة تبطل سجاير ، إلبسي الحجاب ، إبدأ صلي ، بطل تنظر إلى النساء المتبرجات ... إبدأ على طول إنك تسيب الذنوب .. إنك تبقى تائب داخل على التوبة و إنت مصمم مش هازني تاني .. مش هأرجع للسجاير أبداً و لو قطعوني حتت و لو روحي طلعت على سيجارة برضوا مش حأشربها .. مش هكلم بنات مش محارمي .. مش هعمل تشات مع بنات على النت ووووو وانتو عارفين بقى بيحصل ايه دلوقتي على النت حتى الزنا بقى على النت .. مش هأغضبك يا رب خلاص .. عزم ..
كثيير من الناس يبدأ يتوب مثلا يبطل تدخين و يقول بس أنا عارف أنا هارجع له تاني مش هأقدر .. بيرجع ... كثير من الناس بيصلي و يقول بس أنا عارف إن أنا ما بستمرش أنا عارف نفسي بأرجع تاني فما بيستمرش .. لا إبدأ و كلك عزم على أنك لن تعود ..
شرط في صحة التوبة إنك تعزم

ثالث شرط من شروط
التوبة الندم ..
ـــــــــــــــــــــــــ
الندم توبة ... اللي ما بيندمش عاللي فات بيرجع له تاني ..
إزاي أندم .. إن أنا أعتبر إن كل اللي كنت عليه قبل كدة باطل و زور و قذارة .. لازم ..
اللي يقول أنا كنت برضوا كويس ما كنتش بعمل حاجة وحشة هيرجع للوحاشة تاني ..
لازم تعتبر إن كل اللي كنت عليه سيئ و قبيح فتندم ..
إمتى تندم ..؟! .. لما تحس بحمال و و لذة و حلاوة و جلال و متعة ما أنت عليه بعد التوبة .. لما تحس بالحلاوة الجديدة .. تندم تقول يااااه يا خسارة كل دقيقة بعدتها عن ربنا ..!! .. يا مية خسارة على كل لحظة ما كنتش أعرف فيها ربنا .. ما كنتش أعرف فيها ربنا .. ما كنتش مقرب فيها لربنا .. تندم
إزاي تندم .. لما تحس بحلاوة اللي إنت عليه فتندم على اللي فاتك مع الله ..

{أَن تَقُولَ نَفْسٌ يَا حَسْرَتَى علَى مَا فَرَّطتُ فِي جَنبِ اللَّهِ وَإِن كُنتُ لَمِنَ السَّاخِرِينَ{56} أَوْ تَقُولَ لَوْ أَنَّ اللَّهَ هَدَانِي لَكُنتُ مِنَ الْمُتَّقِينَ{57} أَوْ تَقُولَ حِينَ تَرَى الْعَذَابَ لَوْ أَنَّ لِي كَرَّةً فَأَكُونَ مِنَ الْمُحْسِنِينَ{58} "

.. تندم و تندم من قلبك ...


الشرط الرابع رد المظالم ..
ــــــــــــــــــــــــــــــــــــــــــ
إن كل اللي غلطت في حقه.. أخدت حاجة من حقه ترجعهالوا ودة أول طريق التوبة ...

كيف نتوب : بالأربعة دول .. ثم تبدأ تبدل سيئاتك حسنات ... لازم تستحدث بعد التوبة أعمالاً صالحة ..
قال الله "إِلَّا مَنْ تَابَ وَآمَنَ وَعَمِلَ عَمَلًا صَالِحًا "
.. لازم تعمل .. كتير من الناس اللي بيتوبوا و يتوب ما يعملش مش هينفع هيرجع للذنوب تاني لازم يتوب و بعد ما يتوب يعمل عمل صالح .. لازم .. قال تعالى " وَإِنِّي لَغَفَّارٌ لِمَنْ تَابَ وَآمَـنَ وَعَمِلَ صَالِحًا ثُمَّ اهْتَدَى "
نسأل الله أن يرزقنا هذه الأربعة .. أن نتوب و نؤمن و أن نعمل صالحاً فيرزقنا الهداية ..